टिपर दुर्घटनाका घाइतेलाई हेलिकोप्टरबाट उद्धार गरी काठमाडौं लगियो, दुई जना अझै बेपत्ता

कालिकोटमा आज भएको टिपर दुर्घटनाका घाइतेलाई नेपाली सेनाको हेलिकोप्टरबाट उद्धार गरिएको छ।

गम्भीर घाइते भएका रास्कोट नगरपालिका वडा नम्बर २ का निस्पता सार्की र सोही ठाउँका मिन सार्कीलाई उद्धार गरी काठमाडौं लगिएको छ। निस्पताको दाहिने खुट्टा छिनेको छ भने बायाँ कोखामा प्वाल परेको छ ।

घाइते सोही वडाका प्रजे सार्की, अनिता सार्की, विवेक सार्की, अशोक परियार, गोविन्द सार्की र ३ महिने बालकको जिल्ला अस्पताल कालिकोटमा उपचार भइरहेको छ । घटनामा २४ जना भने सामान्य घाइते छन् ।

अझै तीन जना बेपत्ता रहेको कर्णाली प्रदेश प्रहरी कार्यालयका प्रवत्ता प्रहरी उपरिक्षक राजिवबहादुर बस्नेतले जानकारी दिए । वेपत्ताहरुको पहिचान खुलेको छैन ।

कर्णाली नदीमा वेपत्ता भएकाहरुको नेपाली सेना, नेपाल प्रहरी र स्थानीयले खोजीकार्य जारी राखेको प्रहरीले जनाएको छ । नदी धमिलो भएका कारण खोजीमा समस्या भएको प्रहरीको भनाइ छ ।

त्यस्तै घटनामा मृत्यु भएका दुई जनाको पहिचान खुलेको छ । प्रहरीका अनुसार मृत्यु हुनेमा रास्कोट नगरपालिका वडा नम्बर २ का सर्मिला सार्की र थम्की सार्की रहेका छन् । उनीहरुको घटनास्थलमै मृत्यु भएको हो ।

भारतबाट आएका ३९ जना जना नागरिकलाई लिएर रास्कोटतर्फ गइरहेको ना ८ ख ५१३३ नम्बरको टिप्पर कर्णाली नदीमा खसेको थियो । टिप्पर चालक २९ वर्षे रंगनाथ थमलालाई प्रहरीले नियन्त्रणमा लिएको छ ।

घटनापछि कर्णाली प्रदेश सरकारले शोक वक्तव्य जारी गर्दै मृतकप्रति श्रद्धाञ्जली र घाइतेहरुको स्वास्थ्य लाभको कामना गरेको छ । घाइतेहरुको उद्धारका लागि कर्णाली प्रदेशमा मुख्यमन्त्री महेन्द्रबहादुर शाही नेपाली सेनाको हेलिकोप्टरबाट कालिकोट पुगेका थिए ।