बागमती स्वास्थ्य मन्त्रालयको दरबन्दीमा गोदानको आपत्ति

काठमाडौं– बागमती प्रदेशको स्वास्थ्य मन्त्रालयले संंशोधन गरेको प्रस्तावित दरबन्दीमा चिकित्सक समावेश नभएको भन्दै सरकारी चिकित्सक संघ नेपाल (गोदान) ले आपत्ति जनाएको छ। 

संघले विज्ञप्ति जारी गर्दै संशोधन गरेर नयाँ दरबन्दी बनाउँदा पनि चिकित्सकलाई समावेश नगरेको भन्दै आपत्ति जनाएको हो। विज्ञप्तिमा भनिएको छ, ‘नर्सिङ अधिकृत, जनस्वास्थ्य स्वास्थ्य अधिकृत जस्ता अरु विधाका स्वास्थ्यकर्मीहरू समावेश गरिनु तर चिकित्सक समूहको मेडिकल अधिकृत र विशेषज्ञ जानाजान नराखिनु हास्यास्पद एवं खेदपूर्ण छ।’

चिकित्सकलाई पाखा लगाउने काम भएमा विरोध जारी रहने र आन्दोलनका कार्यक्रम गर्ने चेतावनी उसले दिएको छ। ‘चिकित्सा शिक्षा पढेका, स्वास्थ्यमा सबैभन्दा बढी अध्ययन, अनुसन्धान गर्ने चिकित्सक वर्गलाई नीति निर्माणको तहका लागि नियोजित रुपमै अयोग्य देखाउन खोजिनु निकै खेदपूर्ण हीन भावना र कुण्ठाले भरिएको देखिन्छ,’ विज्ञप्तिमा भनिएको छ। यसअघि प्रस्तुत गरेको दरबन्दी तेरिजमा प्रशासन समूहको सचिव रहने व्यवस्था थियो। त्यसमा चिकित्सक तथा स्वास्थ्यकर्मीहरुले विरोध गरेपछि स्वास्थ्य समूहकै सचिव बनाउने गरी संशोधन गरिएको छ।