सिरी ए : नयाँ खेल तालिका कसिलो, ५ दिन मात्र ब्रेक

इटालियन लिग सिरी ए यही जुन २० बाट पुनः सुरु भएर अगस्ट २ सम्म चल्ने पक्का भएको छ। मार्च ९ बाट स्थगित गरिएको लिग छोटो समयमा कसिलो खेल तालिकाका साथ खेल सुरु गर्न लागिएको हो।

त्यहाँको सरकारले गत बिहीबार खेल पुनः सञ्चालन गर्ने स्विकृति दिएपछि लिग सुरु हुन लागेको हो।

सिरी एका टिमले कोरोनापछि पुनः सुरु भएको लिगमा प्रत्येक साता दुई खेल खेल्नुपर्नेछ। सोमबार सार्वजनिक गरिएको खेल तालिकामा यस्तो देखाइएको छ।

नयाँ खेल तालिका अनुसार बाँकी रहेका १२ चरणका लागि सबैजसो दिन खेल राखिएको छ। ६ हप्ता चल्ने खेलमा ५ दिनमात्र ब्रेक दिइएको छ। सप्तान्तका खेलहरु शनिबारबाट सोमवारसम्म चल्नेछन् भने मध्य हप्ताका खेलहरु मंगलबारबाट बिहीबारसम्म सञ्चालन हुनेछन्।

नेपाली समयअनुसार खेल राति ११ः१५ र १ः३० मा हुनेछन् भने कुनै खेल राति ९ बजे पनि हुनेछ।

लिगलिडर युभेन्ट्स र दोस्रो स्थानमा रहेको लाजियोको खेल भने जुलाई २० मा छ। यो खेलले सम्भावित विजेता इंकित गर्ने भएकाले सिरी एमा धेरै प्रशंसकले प्रतीक्षा गरिने खेलका रुपमा लिइन्छ।

महामारीका कारण रोकिएको लिगमा युभेन्ट्स ६३ अंकका साथ नवौं उपाधिको दौडमा छ भने लाजियो एक अंक पछि रहेर युभेन्ट्सलाई पछ्याइरहेको छ।

तेस्रो र चौथो स्थानमा रहेको इन्टर मिलान र एटलान्टाको क्रमशः ५४ र ४८ अंक छ।

एजेन्सी