राना थारुलाई सरकारी कामकाजको भाषा नबनाएको भन्दै आपत्ति

धनगढी- कैलाली र कञ्‍चनपुरमा मात्र बसोबास रहेका राना समुदायले भाषा आयोगले सुदूरपश्चिम प्रदेशको कामकाजी भाषाको रुपमा राना थारु समुदायको भाषालाई नसमेटेको भन्दै आपत्ति जनाएका छन्।

 नेपाल राना थारु समाजलगायत राना थारु समुदायसँग सम्बद्ध विभिन्‍न संघसंस्थाले धनगढीमा पत्रकार सम्मेलन गरेर आपत्ति जनाएका हुन्।  भाषा आयोगले सुदूरपश्चिम प्रदेशको कैलाली र कञ्‍चनपुरमा मात्र बसोबास रहेको राना समुदायको पहिचान मेटाउन खोजेको नेपाल राना थारु समाजको आरोप छ।

भाषा आयोगले प्रतिवेदन सच्याएर राना थारु भाषालाई पनि कामकाजी भाषाको रुपमा उल्लेख गर्नुपर्ने नेपाल राना थारु समाजका अध्यक्ष कृपाराम रानाले बताए। ‘भाषा आयोगले सातवटै प्रदेशका सरकारी कामकाजी भाषा सिफारिस गरेकोमा सुदूरपश्चिम प्रदेशका डोट्याली, थारु, बैतडेली, बझाङ्गी र अछामी भाषिक समुदायलाई हार्दिक बधाइ ज्ञापन गर्दछु,’ समाजका अध्यक्ष कृपाराम रानाले भने, ‘भाषा आयोगले सरकारलाई बुझाएको वार्षिक प्रतिवेदनमा सुदूरपश्चिम प्रदेशको सरकारी कामकाजी भाषाको सिफारिस गर्दा राना थारु भाषा छुटाइएकोमा गम्भीर ध्यानाकर्षण भएको छ।

‘आयोगले डोटेली र थारु भाषालाई सरकारी कामकाजी भाषा मान्यता दिएकोमा हाम्रो कुनै आपत्ति छैन,’अध्यक्ष रानाले भने, ‘तर, त्योसँगै राना थारु समुदायको भाषा पनि समेटिनु पर्दछ।’

 राना थारु समुदायको पहिचानलाई आयोगले मेटाउन खोजेको भन्दै राना थारु समुदायले आन्दोलन गर्ने निर्णय गरेको अध्यक्ष रानाले बताए। उनले आयोगको कदमविरुद्ध र राना थारुको आरक्षण सुनिश्चितताका निम्ति सोमबार धनगढीमा प्रदर्शन गर्ने बताए।