अदालतका स्रेस्तेदारविरुद्ध भ्रष्टाचार मुद्दा

काठमाडौं- कास्की जिल्ला अदालतका स्रेष्तेदार लोकनाथ पराजुलीविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ।

अदालतमा विचाराधीन मुद्दामा नियन्त्रणमा लिएको गाडी छुटाइदिने प्रयोजनका लागि सेवाग्राहीसँग लिएको ३० हजार घुससहित पक्राउ परेका पराजुलीविरुद्ध आयोगले आइतबार मुद्दा दायर गरेको हो।

अख्तियारका प्रवक्ता प्रदीपकुमार कोइरालाले पराजुलीले संगठित अपराध, कर्तव्य ज्यान मुद्दामा दसी प्रमाणको अदालतमा पेस भएको सेवाग्राहीको ग १ च २३६३ नम्बरको कार अदालतको आदेशबमोजिम छुटिसके पनि धरौटी निर्धारण गरी गाडी छोडिदिने भनी घुस लिएको खुलेको बताए।

कारभित्रै घुसबापतको रकम बुझेर पराजुलीले डिएल लिक्वर सपभित्र गई बसेको अवस्थामा आयोगको टोलीलाई देख्नासाथ रकम टुलमुनि फ्याँकेको अवस्थामा बरामद गरेको अख्तियारले जनाएको छ।

जिल्ला वन अभिकृत १ लाख घुसहित पक्राउ

डिभिजन वन कार्यालय नुवाकोटका प्रमुख जयमंगल प्रसाद एक लाख घुससहित पक्राउ परेका छन्। खानीसम्बन्धी कामका लागि विभिन्न बहाना गर्दै सेवाग्राहीसँग लिएको घुससहित अख्तियार दुरुपयोग अनुसन्धान आयोगको टोलीले साहलाई नियन्त्रणमा लिएको हो।  

साहलाई बिदुर नगरपालिका–२ स्थित कार्यालय परिसरबाट शनिबार घुसहित नियन्त्रणमा दिएको अख्तियारले जनाएको छ।