पश्चिममा बनेको मौसमी प्रणाली पूर्वतिर सर्दै, चट्याङ र हावाहुरीको सम्भावना

देशको पश्चिमी भूभागमा बनेको मौसमी प्रणाली पूर्वतिर सर्ने क्रममा हाल गण्डकी र बाग्मती प्रदेश (पोखरादेखि काठमाडौं आसपास) रहेको मौसम पूर्वानुमान महाशाखाले जनाएको छ।

यसका कारण हावाहुरी, मेघ गर्जन र चट्याङसहित हल्का वर्षाको सम्भावना रहेको महाशाखाको भनाइ छ ।

चट्याङबाट बच्न आवश्यक सतर्कता अपनाउन पनि महाशाखाले आग्रह गरेको छ।

यस्तो रहनेछ तीन दिनको मौसम

आज (आइतबार)

देशको पश्चिमी भूभाग लगायत मध्य र पूर्वका पहाडी भूभागमा सामान्य बदली रहनेछ भने बाँकी भूभागमा आंशिक बदली रहनेछ। पश्चिमी भूभागका केही स्थानहरुमा साथै मध्य र पूर्वका एक दुई स्थानहरुमा मेघ गर्जन, चट्याङ, असिना र हावाहुरीसहित वर्षाको सम्भावना रहेको छ।

भोलि (सोमबार)

देशको अधिकांश भूभागमा सामान्य बदली रहनेछ। देशको पहाडी भूभागका केही स्थानहरु र तराईका थोरै स्थानहरुमा मेघ गर्जन, चट्याङ, असिना र हावाहुरी सहित वर्षाको सम्भावना रहेको छ।

पर्सी (मंगलबार)

देशको अधिकांश भूभागमा सामान्य बदली रहनेछ। देशका केही स्थानहरुमा मेघ गर्जन, चट्याङ, असिना र हावाहुरी सहित वर्षाको सम्भावना रहेको छ।