लकडाउनमै काठमाडौंमा खतरनाक दुर्घटना, ८ जनाको मृत्यु

काठमाडौं- लकडाउनको अवधिमा काठमाडौं उपत्यकाका विभिन्न स्थानमा भएको सवारी दुर्घटनामा ८ जनाको मृत्यु भएको छ ।

उपत्यकाभित्र २ सय १२ सवारी दुर्घटना हुँदा ८ जनाको मृत्यु भएको महानगरीय ट्राफिक प्रहरी महाशाखाले जनाएको छ । यसक्रममा सातजना गम्भीर र १ सय ३९ सामान्य घाइते भएका छन् ।

मृत्यु हुनेमा अधिकांश मोटरसाइकल चालक छन् । सुनसान सडकमा गति अत्यधिक हुँदा दुर्घटनामा परेको प्रहरीको निष्कर्ष छ ।

महाशाखा प्रमुख एसएसपी भीम ढकालले खुला सडक हुँदा सवारीसाधनको गति अत्यधिक हुने र नियन्त्रणमा नआउँदा दुर्घटना हुने बताए । केहीले मादक पदार्थ सेवन गरेर सवारीसाधन चलाइएको भेटिएको छ ।

दुर्घटनामा परेका सबै व्यक्ति सवारी पास लिएर सडकमा निस्किएको महाशाखाले जनाएको छ ।

शुक्रबार मात्रै काठमाडौंको सोल्टी मोडमा बा.२१ च ४३४७ नम्बरको कार र बा.७२ प ८१७२ नम्बरको मोटरसाइकल एकआपसमा ठोक्किदा मोटरसाइकल चालक मोरङ वेलबारी कानेपोखरी घर भएका २३ वर्षीय टिकाराज गेलालको मृत्यु भएको थियो ।

दुर्घटनामा गम्भीर घाइते भएका गेलालको नेशनल अस्पताल कलंकीमा उपचारको क्रममा मृत्यु भएको हो ।