नेकपा एकीकृत समाजवादी पाल्पाको अध्यक्षमा पाण्डे

बुटवल– नेकपा एकीकृत समाजवादी पाल्पाको जिल्ला अध्यक्षमा खिमानन्द पाण्डे (कमल) चयन भएका छन् । पाण्डे एमालेका जिल्ला उपसचिव हुन्। नेकपा एकीकृत समाजवादीले शनिबार गरेको जिल्ला भेलाले पाण्डेको अध्यक्षतामा ७५ सदस्यीय जिल्ला कमिटी चयन गरेको हो। 

जिल्ला कमिटी उपाध्यक्षमा प्रदेश सभा सदस्य रमा घर्ती, सचिवमा मोहनलाल गैरे, उपसचिवमा कमल सेन चयन भएका छन्। जिल्ला कमिटीको पहिलो बैठकले ७५ सदस्यीय जिल्ला कमिटीलाई विस्तार गरेर १ सय २५ सदस्यीय बनाउने निर्णयसमेत गरेको पार्टी सचिव गैरेले बताए। 

बैठकले  लेखनाथ पोखरेलको संयोजकत्वमा ७ सदस्यीय सल्लाहाकार समितिसमेत गठन गरेको छ। जसमा पदमप्रसाद अर्याल, चन्द्रकान्त पोखरेल, वसन्त श्रेष्ठ, विष्णुप्रसाद खनाल, कर्णबहादुर सुनार र पीताम्बर कँडेल छन्।

भेलालाई सम्बोधन गर्दै एकीकृत समाजवादीका केन्द्रीय कमिटी सदस्य सोमप्रसाद पाण्डेले नवनिर्वाचित टिमलाई जनताको मनले जित्ने अभियानमा लाग्न निर्देशन दिए। उनले निर्वाचन चुनाव चिन्हले मात्रै जित्न सम्भव नभएको बताए।