कोरोना जितेर घर फर्किइन् कैलालीकी ५० वर्षीया महिला

काठमाडौं– कैलालीको लम्की चुहा नगरपालिका–१ की ५० वर्षीया कोरोना संक्रमित महिला पनि कोरोना जितेर घर फर्किएकी छन्।

उनी सुदूरपश्चिममा कोरोना जितेर घर फर्किने चौथो संक्रमित हुन्। धनगढीस्थित सेती प्रादेशिक अस्पतालमा उपचाररत ती महिला बिहीबार डिस्चार्ज भएको अस्पतालका सूचना अधिकारी दिलिप श्रेष्ठले जानकारी दिए।

श्रेष्ठका अनुसार लगातार दुई पटक रिपोर्ट नेगेटिभ आएपछि उनलाई अस्पतालबाट डिस्चार्ज गरिएको हो।

उनी वीरगंजबाट कैलाली आएर १२ दिन क्वारेन्टाइनमा बसेकी थिइन्। वैशाख १ गते कोरोना पुष्टि भएपछि सेती प्रादेशिक अस्पतालमा उपचारका लागि भर्ना गरिएको थियो।

धनगढी उपमहानगरपालिका–५ का ३४ वर्षीय पुरुष, लम्कीका २१ वर्षीय युवक र कञ्चनपुर वेदकोटका ४१ वर्षीय पुरुष यसअघि नै कोरोना जितेर घर फर्किसकेका छन्।

सुदूरपश्चिममा कोरोना संक्रमित धनगढी उपमहानगरपालिका–५ की ३४ वर्षीय एक महिला मात्रै सेती अस्पतालको आइसोलेसनमा उपचाररत छिन्।

उनी कोरोना जितेर घर फर्किएका ३४ वर्षीय युवकको भाउजू हुन्।