मध्यपश्चिमाञ्चल विश्वविद्यालयमा सेनिटाइजर उत्पादन सुरु

मध्यपश्चिमाञ्चल विश्वविद्यालय सुर्खेतले सेनिटाइजर उत्पादन सुरु गरेको छ ।

कोरोना भाइरसपछि बजारमा देखिएको अभाव टार्ने र विश्वविद्यालयलाई उत्पादनसँग जोड्ने उद्देश्यका सेनिटाइजर उत्पादन थालिएको शिक्षा शास्त्र संकायका सहायक डीन एवम् सेनिटाइजर उत्पादन समन्वय समितिका संयोजक विष्णु खड्काले जानकारी दिए ।

बिहीबारमात्रै विश्वविद्यालयले ६० मिलिलिटरका एक हजार थान उत्पादन गरेको छ । पहिलो चरणमा उत्पादिन सेनिटाइजर कर्णालीका विभिन्न अस्पताल र प्रदेश सरकारका मन्त्रालयलाई निःशुल्क रुपमा वितरण गरिने खड्काले जनाए ।

करिव ७५ हजारको लागतमा विज्ञान तथा प्रविधि केन्द्रीय क्याम्पसको साइन्स ल्याबमा सेनिटाईजर उत्पादन सुरु गरिएको हो । अवदेखि निरन्तर रुपमा सेनिटाइजर उत्पादन गरिने विश्वविद्यालयले जनाएको छ ।

बजार मूल्यभन्दा सस्तो तर गुणस्तरिय उत्पादन गर्ने उद्देश्यले खड्काको संयोजकत्वमा पाँच सदस्यीय सेनिटाइजर उत्पादन समिति समेत गठन गरिएको छ । जसको सदस्यमा विज्ञान तथा प्रविधि केन्द्रीय क्याम्पसका क्याम्पस प्रमुख कृष्णप्रसाद चपाई, प्रध्यापक पदमराज जोशी, सविता ढुङ्गाना र युवा बैज्ञानिक राजेन्द्र विष्ट रहेका छन् ।