सशस्त्र प्रहरी डिएसपी कुटपिटबारे छानबिन गर्न तीन सदस्यीय समिति गठन

काठमाडौं– सशस्त्र प्रहरीको रूपन्देहीको सुनौलीस्थित ३८ नम्बर गुल्मका गुल्मपति सशस्त्र प्रहरी नायब उपरीक्षक मानबहादुर शाही कुटपिट घटनाबारे छानबिन गर्न समिति गठन गरिएको छ।

ब्यारेकभित्र सशस्त्र प्रहरी निरीक्षक केशव भट्टराई र दयाराम पौडेलले शाहीलाई कुटपिट गरेको घटनाबारे छानबिन गर्न सशस्त्र प्रहरी उपरीक्षक तेजप्रसाद पोखरेलको संयोवकत्वमा तीन सदस्यीय समिति गठन गरिएको सशस्त्र प्रहरी बलले जनाएको छ।

सशस्त्र प्रहरी बलका प्रवक्ता सशस्त्र प्रहरी नायब महानिरीक्षक प्रवीणकुमार श्रेष्ठले घटनाको अनुसन्धान गर्न ५ नम्बर वाहिनीमा कार्यरत पोखरेलको नेतृत्वमा तीन सदस्य छानबिन टोली गठन गरेको जानकारी दिए।

“आफ्नै हाकिमलाई कुटपिट गरेर अनुशासनहिन काम गरेको पाइयो,” श्रेष्ठले भने, “घटनाकाे छानबिन गर्न बाहिनीलाई निर्देशन भइसकेको छ।” घटनाको छानबिनपछि दोषीमाथि कारवाही गरिने श्रेष्ठले बताए।

प्रहरी निरीक्षकद्वयले मदिरा सेवन गरी मंगलवार राति शाहीलाई कुटपिट गरेको सशस्त्र प्रहरीले जनाएको छ। कुटपिटको कारण भने नखुलेको सशस्त्र प्रहरी बलले जनाएको छ।