गौहत्या अभियोगमा पक्राउ

काठमाडौं - गाई र गोरु काटेको अभियोगमा प्रहरीले दुई जनालाई पक्राउ गरेको छ। गाई काटेको अभियोगमा बाँकेमा एक जना र गोरु काटेको अभियोगमा सिन्धुपाल्चोकबाट एक जना पक्राउ परेका प्रहरीले जनाएको छ।

बाँकेको खजुरा गाउँपालिका-८ चमकका ४० वर्षीय नविबक्स अली दर्जीलाई गाई काटेको अभियोगमा बुधबार राति प्रहरीले पक्राउ गरेको हो। दर्जीले स्थानीय ३५ वर्षीय वितन खाँ, ३० वर्षीय नफिस साईसँग मिलेर गाई काटेको प्रहरीले जनाएको छ।

प्रहरी चौकी रनियापुरबाट खटिएको टोलीले दर्जीलाई गाईको मासुसहित घटनास्थलबाटै पक्राउ गरेको बाँके प्रहरीले जनाएको छ। गाई काट्ने कार्यमा संलग्न वितन र नफिसको प्रहरीले खोजी गरिरहेको छ।

यस्तै सिन्धुपाल्चोकको ईन्द्रावती गाउँपालिका-६ सिपाखोलाका ४२ वर्षीय यम बहादुर तामाङलाई गोरु काटेको अभियोगमा बिहीबार बिहान प्रहरीले पक्राउ गरेको छ। स्थानीय लाल बहादुर बम्जनको गोठमा गोरु काटिरहेको अवस्थामा ईलाका प्रहरी कार्यालय नवलपुरबाट खटिएको टोलीले गोरुको मासु र गोरु काट्न प्रयोग भएको बन्चरो तथा खुकुरीसहित तामाङलाई पक्राउ गरेको हो। घटनामा संलग्न लाल बहादुर र बिष्णे तामाङको प्रहरीले खोजी गरिरहेको जनाएको छ।