आमाको मुख हेर्ने दिन लकडाउन तोडेको भन्दै ८ सय ७२ जना पक्राउ

काठमाडौं- कोरोना संक्रमितको संख्या बढ्दै गएपछि सरकारले लकडाउनमा कडाइ गरेको छ ।

लकडाउनको ३२ औं दिन बिहीबार बिहान काठमाडौं उपत्यका विभिन्न स्थानबाट ८ सय ७२ जनालाई पक्राउ गरेको छ । आमाको मुख हेर्ने दिनका लागि किनमेल गर्ने भन्दै भिड गर्नेहरु बढेपछि प्रहरीले धमाधम पक्राउ गरेको हो ।

पक्राउ पर्नेमा २ सय २८ जना महिला छन् । पक्राउ परेकालाई दुई घण्टा सडकमै होल्ड गरेर राखिएको महानगरिय प्रहरी परिसर प्रमुख डिआइजी विश्वराज पोखरेलले जानकारी दिए ।

यसैगरी, दुई पाङ्ग्रे र चारपाङग्रे गरेर ८८ वटा सवारी साधन नियन्त्रणमा लिएको छ।

कोरोना संक्रमित थपिदै गएको अवस्थामा पसलहरुमा भीड गर्ने, अत्यावश्यक कामबिनै घरबाहिर निस्किनेलाई पक्राउ गरिएको डिआइजी पोखरेलले बताए । उनले भने– 'चाडपर्व मनाउने भन्दा रोगसँग जोगिने बेला हो यो । यदि यसलाई मनन नगरि कोहि घरबाहिर निस्किछ भने हामी कसैलाई पनि छाड्दैनौँ ।'

काठमाडौं उपत्यकाबाट पछिल्लो एक हप्तामा औसतमा हरेक बिहान ८ सय ब्यक्ति पक्राउ पर्ने गरेका छन् । कोरोना संक्रमित थपिदै गएसँगै लकडाउनमा थप कडाइ गरिएको छ ।

सरकारले चैत ११ गते बिहान ६ बजेदेखि लकडाउन सुरु गरेको थियो । बैशाख १५ गतेसम्म लकडाउन जारी रहने छ ।