राहतमा ढिलाइ हुँदा पर्सामा झडप

वीरगन्ज- राहतको वितरणमा ढिलाइ भएपछि पर्साको जिराभवानी गाउँपालिकामा बुधबार सशस्त्र प्रहरी र स्थानीयबीच झडप भएको छ।

राहत वितरणमा ढिला भएको आक्रोशमा सेढवास्थित गाउँपालिका कार्यालय घेराउ गर्न पुगेका करिब तीन सयको संख्यामा दलित, विपन्नहरुको भीड हटाउन सशस्त्र प्रहरीले लाठी चार्ज गरेपछि झडप भएको बताइएको छ।

झडपमा एकजना सञ्चारकर्मीसहित ८ जना घाइते भएका छन्। स्थानीयले प्रहार गरेको ढुंगा लागेर नारायणी एमफमका संवाददाता कृष्णमोहन साह घाइते भएका हुन् ।

लकडाउन लागू भएको एक महिना बितिसक्दा पनि जिराभवानी गाउँपालिकाले प्रभावित परिवारलाई राहत वितरण नगरेपछि आक्रोशित स्थानीय गाउँपालिका कार्यालय घेराउ गर्न पुगेका थिए। स्थानीयले ढुंगामुढा गर्न थालेपछि सशस्त्र प्रहरीले रोक्न खोजेको थियो। त्यस क्रममा सामान्य झडप भएको गाउँपालिका उपाध्यक्ष उषादेवी थरुनीले बताइन्।

लकडाउनले प्रभावित परिवारलाई राहत वितरण गर्न प्रदेश सरकारले गाउँपालिकालाई १० लाख रुपैयाँ पठाइसकेको छ भने दोस्रो चरणको राहतसमेत घोषणा गरिसकेको छ ।