छोरीको हत्या आरोपमा बाबु र बाबुको हत्या आरोपमा छोरा पक्राउ

काठमाडौं- पर्सामा ७ वर्षीया छोरीको हत्या गरेको आरोपमा बाबु र धनुषामा बाबुको हत्या गरेको आरोपमा छोरा पक्राउ परेका छन्।
छोरीको घाँटी च्यापेर हत्या गरेको आरोपमा वीरगन्ज महानगरपालिका–१ छप्कैयाका २९ वर्षीय सञ्जयकुमार साह सर्राफलाई प्रहरीले पक्राउ गरेको छ।

प्रहरीका अनुसार सर्राफले ७ वर्षीया छोरी अंशुलाई चैत ११ गते दिउँसो घाँटी थिचेर हत्या गरेको अनुसन्धानबाट खुलेको छ।

उनले छोरी झन्डिरहेको अवस्थामा फेला परेको भन्दै तत्काल उपचारका लागि नारायणी अस्पतालमा लैजाने क्रममा मृत्यु भएको बताएका थिए। अनुसन्धान गर्दा सर्राफले घाँटी च्यापेर छोरीको हत्या गरेको स्वीकारेको प्रहरीले जनाएको छ।

यस्तै फलामको रड प्रहार गरी ५५ वर्षीय बुबा साैकिया सदाको हत्या गरेको आरोपमा धनुषा प्रहरीले सहिदनगर नगरपालिका–९ डुमरियाका ३० वर्षीय नथनी सदालाई पक्राउ गरेको छ। प्रहरीका अनुसार घरायसी विवादमा नथुनीले बुबाको टाउकोमा फलामको रडले प्रहार गर्दा घटनास्थलमै मृत्यु भएको थियो।