धागो कारखानालाई बनाइयो भेन्टिलेटरसहित ५० बेडको सुविधासम्पन्न कोरोना अस्पताल

भैरहवा– प्रदेश ५ को केन्द्र बुटवलमा आइतरबारदेखि सुविधा सम्पन्न कोरोना सघन उपचार कक्ष तयार भएको छ।

कोरोना अस्पतालको रुपमा सञ्चालनमा आएको धागो कारखानामा रहेको आइसोलेसन कक्षलाई स्तरोन्नति गरी सुविधासम्पन्न सघन उपचार कक्ष बनाइएको हो ।

उक्त अस्पतालमा चार थान भेन्टिलेटरसहित ८ बेडको आईसीयू पनि तयार भएको छ । अस्पतालमा निर्माण भएको कोरोना सघन उपचार कक्ष (आईसूयी) को आइतबार प्रदेश ५ का मुख्यमन्त्री शंकर पोखरेलले शुभारम्भ गरेका छन् ।

उक्त कक्षको शुभारम्भ गर्दै मुख्यमन्त्री पोखरेलले सबैको साझा प्रयासले नै कोरोना भाइरसलाई हराउन सकिने धारणा राखे । उनले प्रदेश ५ को बुटवल, भैरहवा, दाङ र नेपालगञ्जमा सञ्चालन हुने कोरोना विशेष अस्पतालले आम मानिसलाई राम्रो सेवा दिने विश्वास पनि व्यक्त गरे ।

सघन कक्षको सञ्चालनसँगै कोरोना लक्षण देखिएका बिरामीमा बढेको डर स्वतः हराएर जाने प्रदेश सरकारका मन्त्री लिला गिरीले दाबी गरे । मन्त्री गिरीले भने, ‘मान्छेहरुमा राम्रो उपचार गर्ने ठाउँ छैन, कोरोना लागिहाल्यो भने मरिन्छ कि भन्ने डर त्रास थियो । त्यो आजदेखि हराएको छ । सकेसम्म कोरोना लाग्नै दिन भएन, लागिहालेमा उपचार राम्रो गरेर निको गराउनेगरी सुविधा सम्पन्न अस्पताल शुरु भएको छ।’

प्रदेश ५ सरकारले रुपन्देहीमा बन्द रहेको धागो कारखानालाई आइसोलेसनसहित कोरोना विशेष उपचार अस्पतालको रुपमा विकास गरेको हो। यसैगरी भीम अस्पताल भैरहवालाई पनि कोरोना विशेष उपचार अस्पतालको रुपमा विकास गरिरहेको छ ।

सरकारले बुटवलस्थित प्रादेशिक अस्पतालको मातहतमा रहने धागो कारखानास्थित कोरोना विशेष अस्पतालको व्यवस्थापन हेर्न उद्योग पर्यटन बन तथा वातावरण मन्त्री लिला गिरीलाई संयोजकको जिम्मेवारी दिएको छ ।

यसैगरी भैरहवास्थित भीम अस्पतालको संयोजन गर्न सामाजिक विकास मन्त्री सुदर्शन बराललाई जिम्मेवारी दिएको छ।

सरकारले केन्द्रीय आयुर्वेद विद्यापिठ बेलझुण्डी दाङका लागि आन्तरिक मामिला तथा कानुन मन्त्री कुल प्रसाद केसी संयोजक र सुशील कोइराला क्यान्सर अस्पताल खजुराका लागि भौतिक पूर्वाधार विकास मन्त्री बैजनाथ चौधरीलाई संयोजक चयन गरेको छ ।

बुटवलको सोही अस्पतालमा भेन्टिलेटर र आईसीयू नहुँदा चैत १६ गते सैनामैनाका ३३ वर्षिय बाबुराम थापाको अकालमा ज्यान गएको भन्दै सरकारको चर्को विरोध भएको थियो । त्यसपछि प्रदेश सरकारले बजेट नै छुट्याएर सघन उपचार कक्षको निर्माण सुरु गरेको थियो ।

उक्त अस्पतालको स्तरोन्नतिमा स्थानीय सामाजिक संघसंस्थाले पनि सहयोग गरेका छन् । चैत १० गतेदेखि आइसोलेसन सेवा आरम्भ गरिएको उक्त अस्पतालमा हालसम्म ३१ जनाको उपचार भएको छ । जसमध्ये ३० जना निको भएर डिस्चार्ज भएको डा. राजेन्द्र खनालले जानकारी दिए।