राहत कोषमा गाउँपालिका अध्यक्षको व्यक्तिगत एक लाख सहयोग

जनकपुरधाम– महोत्तरीको एकजना गाउँपालिका अध्यक्षले कोरोना रोकथाम राहत कोषमा व्यक्तिगत एक लाख रुपैयाँ सहयोग गरेका छन् ।

महोत्तरीको पिपरा गाउँपालिकाका अध्यक्ष विक्रम चौधरीले गाउँपालिकाले स्थापना गरेको राहत कोषमा एक लाख रुपैयाँ सहयोग गरेका हुन् ।

कोरोना रोकथामको लागि स्थापना गरिएको राहत कोषमा आफूले पनि व्यक्तिगत रुपमा सहयोग गर्नुपर्ने धेयका साथ एक लाख रुपैयाँ जम्मा गरेको चौधरीले बताएका छन् ।

‘कोरोना रोकथाम गर्न हामीले राहत कोष स्थापना गरेका छौं,’ उनले भने,‘अध्यक्षको हैसियतले मैलेपनि सहयोग गर्नुपर्छ मलाई लाग्यो । त्यसैले कोषमा व्यक्तिगत रुपमा यो रकम सहयोग गरेको हुँ ।’

हालसम्मे गाउँपालिकामा कोरोना शंकास्पद कोही नदेखिएको बताउँदै चौधरीले त्यस्तो अवस्था आए आफूहरु पूर्णरुपले तयार रहेको बताए । गाउँपालिकाको मुकाम पिपरामा १८ बेडको क्वारेन्टाइन स्थापना गरेपनि हालसम्म कसैलाई राख्नुपर्ने अवस्था नआएको उनको भनाइ छ ।

गाउँपालिकाभित्र ४ हजार ५ सय घुरधुरीलाई राहत वितरण गर्नुपर्ने र राहत वितरण कार्य सोमबारदेखि सुरु हुने अध्यक्ष चौधरीले जानकारी दिए ।