तीनजना कोरोना संक्रमित बसेको वीरगञ्जको छपकैया सील

तीनजना कोरोना भाइरस संक्रमित बसेको वीरगञ्जको छपकैया क्षेत्र सील गरिएको छ । वीरगञ्जको एउटा मस्जिदमा बसिरहेका तीनजना भारतीय नागरिकमा कोरोना संक्रमण पुष्टि भएपछि छपकैयास्थित मस्जिद क्षेत्र पूर्ण रुपमा सील गरिएको हो ।

कोरोना संक्रमित फेला परेपछि त्यस क्षेत्रलाई सील गर्न प्रदेश २ सरकारले निर्देशन दिएको थियो । संक्रमण फैलिन नदिन वीरगञ्ज महानगरपालिका–२ छपकैयालाई सील गर्न तथा संक्रमितहरुको सम्पर्कमा आएका सबैको पत्ता लगाउन प्रदेश सरकारले निर्देशन जारी गरेको हो ।

प्रदेश सरकारको निर्देशनलगत्तै कोरोना रोकथाम, व्यवस्थापन र नियन्त्रणको लागि प्रमुख जिल्ला अधिकारीको अध्यक्षतामा गठित सुरक्षा समितिको बैठकले छपकैयास्थित रहेको मस्जिद क्षेत्रलाई सील गर्ने निर्णय गरेको छ ।

तीनजना भारतीयमा कोरोना संक्रमणको पुष्टि भएलगत्तै वीरगंजमा संक्रमणको त्रास फैलिएको छ । स्थानीयवासी त्रसित बनेका छन् । त्यहाँका अधिकांश टोलवासीले आफ्नो टोल प्रवेश गर्ने मुख्य द्वारमा प्रवेश निषेध लेखिएको बोर्ड झुन्ड्याएर बार लगाएका छन् ।

विगत केहीदिनयता वीरगञ्जमा बसिरहेका भारत उत्तर प्रदेशका ३३ वर्षीय नुर मोहम्मद, सोही ठाउँ बस्ने ४४ वर्षीय मोहम्मद युसुफ र दिल्ली बस्ने ५५ वर्षीय इब्राहिम कोरोना संक्रमित रहेको पुष्टि भएको छ ।