रिपोर्ट नेगेटिभ देखिएपछि सुर्खेत क्वारेन्टाइनका १८३ जनालाई घर पठाइयो

सुर्खेत– सुर्खेतको खुलामञ्चस्थित क्वारेन्टाइनका एक सय ८३ जनाको बिदाई गरिएको छ।

कोरोना भाइरस रोग (कोभिड–१९) संक्रमण परीक्षण गर्दा रिपोर्ट नेगेटिभ देखिएपछि उनीहरूलाई बिदाई गरिएको हो। उनीहरूले सात दिन अनिवार्यरूपमा होम क्वारेन्टाइनमा बस्नुपर्नेछ।

उनीहरूलाई होम क्वारेन्टाइनमा सात दिन बस्ने शर्तमा हस्ताक्षर गरेर घर पठाइएको जिल्ला स्वास्थ्य सेवा कार्यालयका प्रमुख वरिष्ठ जनस्वास्थ्य अधिकृत चेतननिधि वाग्लेले जानकारी दिए। 

प्रदेश सरकारले क्वारेन्टाइनमा राखिएका जुम्ला, जाजरकोट र सुर्खेत पश्चिमका स्थानीयलाई बसमा घर पठाएकाे हाे। तीनवटै ठाउँका लागि छुट्टाछुट्टै बसको व्यवस्था गरिएको थियो।

क्वारेन्टाइनमा बसेर घर फर्किएका सबै गाउँमा कोरोना विरुद्धको अभियानमा सहभागी हुने बताइएको छ।

क्वारेन्टाइनमा राखिएका १ सय ८८ जनामध्ये पाँच जनाको भने रिपोर्ट आउन बाँकी रहेको वाग्लेको भनाइ छ। त्यहाँ भारतबाट गाउँ फर्किएकालाई राखिएको थियो।