प्रदेश कोरोना नियन्त्रण तथा उपचार कोषमा पौने १२ करोड

भैरहवा– कोरोना भाइरसको सम्भावित जोखिमबाट बच्न प्रदेश ५ सरकारले स्थापना गरेको कोरोना नियन्त्रण तथा उपचार कोषमा ११ करोड ७५ लाख ८४ हजार रुपैयाँ जम्मा भएको छ ।
हालसम्म उक्त कोषमा सर्वसाधारणले मोबाइल बैंकिङमार्फत् सबैभन्दा कम १ सय रुपैयाँदेखि सबैभन्दा बढी २५ लाख ५० हजार रुपैयाँसम्म जम्मा भएको छ । साइन रेसुङ्गा डेभलपमेण्ट बैंकले २५ लाख ५० हजार रुपैयाँ जम्मा गरेको छ।

त्यसैगरी भाटभटेनी सुपर मार्केटले २५ लाख, सिद्धार्थ बैंक, कुमारी बैंक, तिनाउ मिसन डेभलपमेन्ट बैंक र लक्ष्मी बैंकले दश–दश लाख रुपैयाँ जम्मा गरेका छन् । त्यसैगरी सिटिजन बैंक ७ लाख रुपैयाँ, कृषि विकास बैंक, गरिमा बैंक, मेगा बैंक र माछापुच्छ्रे« बैंक, राष्ट्रिय बिमा संस्थानले ५–५ लाख रुपैयाँ जम्मा गरेको मुख्यमन्त्रीको सचिवालयले बताएको छ ।

यसैगरी उक्त कोषमा गण्डकी बिकास बैंक र निर्धन उत्थान बैंकले चार–चार लाख जम्मा गरेका छन् ।

त्यसैगरी मुख्यमन्त्री तथा मन्त्रीपरिषद कार्यालयले ३ लाख ९६ हजार ९७, क्रिमसन कलेजले २ लाख ५५ हजार, नेपाल उद्योग बाणिज्य महासंघ प्रदेश समितिले २ लाख ५१ हजार, लुम्बिनी आई ईन्स्टिच्युटले २ लाख २२ हजार २ सय २२, ग्रामीण विकास लघुवित्त वित्तीय संस्था लिमिटेडले २ लाख ५० हजार, सामूहिक वचत तथा ऋण सहकारी सस्थाले २ लाख, नेपाल भारत मैत्री समाजले २ लाख, लक्ष्मी लघुवित्त सहकारीले २ लाख, प्रगतिशिल इञ्जिनियरिङ एशोसिएशनले १ लाख ५ हजार ५ सय, सशक्त बचत तथा ऋण सहकारी संस्थाले १ लाख ११ हजार, कैलाश बिकास बैंकले १ लाख १ हजार, उद्योग व्यापार संगठन रुपन्देहीले १ लाख १ हजार, रोटरी क्लब अफ तिनाउ बुटवलले, ६० हजार जम्मा गरेका छन् ।

त्यसैगरी बुटवल—११ निवासी शेरबहादुर गुरुङबाट १ लाख ५ हजार, प्रतिनिधिसभा सदस्य राधा ज्ञवालीबाट १ लाख रुपैयाँ, लीलामणि पौडेलबाट ५० हजार र कृष्ण बहादुर केसीबाट ४० हजार ५ सय ५५ रुपैंया जम्मा भएको छ । उक्त कोषमा प्रदेश सरकारले १० करोड रुपैंयाँ जम्मा गरेको छ ।

यसका साथै बुटवलको धागो कारखानामा रहेको आईसोलेसन विशेष अस्थायी अस्पतालमा गौतमबुद्ध सामुदायिक मुटु अस्पतालले आईसियुका लागि आबश्यक उपकरण दिने घोषणा गरेको छ । नेपाल उद्योग परिसंघले प्रदेश ५ मा २० लाख रुपैयाँ र एनआईसि एशिया बैंकले ५ लाख रुपैयाँ बराबरको खाद्यान्न सहयोग गरेका छन् । एनएमबी बैंकले १ सय थान स्वास्थ्य सामग्री पिपिई प्रदान गरेको छ ।