कसरी जुट्छ राहत प्याकेजको रकम ?

सरकारले कोरोना भाइरसबाट प्रभावितका लागि घोषणा गरेको राहतका लागि विदेशी दाताबाट ऋण लिने निर्णय गरेको छ। आइतबार साँझ बसेको मन्त्रिपरिषद् बैठकले करिब २२ अर्ब रुपैयाँ सहुलियतपूर्ण ऋण लिने निर्णय गरेको हो।

अर्थमन्त्री तथा सरकारका प्रवक्ता डा. युवराज खतिवडाका अनुसार अन्तर्राष्टिय मुद्रा कोषबाट उपलब्ध हुने निर्ब्याजी १३ अर्ब ९ करोड ऋण सुविधा लिने निर्णय भएको छ।

यस्तै, विश्व बैंकबाट आपतकालीन स्वास्थ्य क्षेत्र सहयोग कार्यक्रम अन्तर्गत प्राप्त हुने तीन अर्ब ४८ करोड सहुलियतपूर्ण ऋण सहायतासमेत स्वीकार गर्ने निर्णय सरकारले गरेको छ।

एसियाली विकास बैंकले घोषणा गरेको सहयोग कार्यक्रम पनि स्वीकार गर्ने निर्णय भएको मन्त्री खतिवडाले जानकारी दिएका छन्। अन्य सम्भावित विकास साझेदारबाट परिचालित हुन सक्ने स्रोतका लागि पनि पहल गर्ने पनि निर्णय भएको छ ।

राहत प्याकेजका लागि वार्षिक बजेटको रकमबाट रकमान्तर गर्ने, स्थानीय तह, प्रदेश र संघको कोरोना उपचार कोषमा जम्मा हुने रकम, विपद् व्यवस्थापन र प्रधानमन्त्री दैवी प्रकोप राहत कोषमा जम्मा भएको रकम पनि खर्च गरिनेछ।

यस्तै, सार्वजनिक संस्थानबाट दिइने छुटको हिस्सा संस्थानहरुले नै व्यहोर्ने व्यवस्था मिलाइने मन्त्री खतिवडाले जानकारी दिए ।