विपन्नलाई नगरको निःशुल्क खाद्यान्न

सिरहा- मिर्चैया नगरपालिकाले कोरोना भाइरसका कारण लकडाउनमा रहेका अति विपन्न तथा दलित परिवारलाई निःशुल्क खाद्यान्न वितरण गरेको छ।

नगरपालिकाले १२ वटै वडाका पाँच सयभन्दा बढी परिवारलाई राहत वितरण गरेको मेयर श्रवण यादवले जनाए।

उनले भने, ‘गाउँघरमा अहिले पनि दैनिक ज्याला मजदुरी गरेर जीविकोपार्जन गर्नेह छन्। उनीहरुलाई राहतरुवरुप खाद्यान्नलगायत सामग्री उपलब्ध गराएका हौं।’

प्रतिपरिवारलाई १५ किलो चामल, २ किलो दाल, २ किलो आलु, २ किलो चुउरा, भुजा, आधा लिटर खाने तेल, १ किलो नुन, साबुन र परिवार संख्याका आधारमा घरमै पुगेर करिब २० हजारभन्दा बढी मास्क वितरण गरेको मेयर यादवले बताए ।

नगरपालिकाका पदाधिकारी, कर्मचारी तथा प्रशासनको उपस्थितिमा निश्चित दुरी कायम गरी गाउँमै पुगेर राहत वितरण गरेको प्रमुख प्रशासकीय अधिकृत दिल्लीराम भट्टराईले बताए।

कोरोनाका कारण दैनिक ज्याला मजदुरी गरिखानेहरुलाई नेकपा, गोलबजार नगरपालिका ७ वडा कमिटिले वडाका विपन्न, दलित तथा गरिबलाई निःशुल्क राहत सामग्री वितरण गरेको छ।

वडामा रहेका करिव ५ सयभन्दा बढी दलित, गरिब परिवारलाई ५ केजी चामल, दाल, नुन, हातधुन साबन र परिवार संख्याका आधारमा मास्क वितरवण गरेको नेता जीवन यादवले जानकारी दिए।