धरानमा कोरोना भाइरस परीक्षण सुरु

काठमाडौं- धरानस्थित बीपी कोइराला स्वास्थ्य विज्ञान प्रतिष्ठानमा शनिबारदेखि कोरोना भाइरसको नमुना परीक्षण सुरु गरिएको छ। स्वास्थ्य तथा जनसंख्या मन्त्रालयका प्रवक्ता विकास देवकोटाका अनुसार केही दिनअघि नै परीक्षण सुरु गर्ने तयारी भए पनि प्राविधिक कारणले ढिलाइ भएको हो।

यसअघि सहिद शुक्रराज टपिकल अस्पताल टेकुमा मात्रै कोरोना भाइरस परीक्षण हुँदै आएको थियो। प्रवक्ता देवकोटाका अनुसार अब विभिन्न प्रदेशमा कोरोना परीक्षणको व्यवस्था गरिने विषयमा छलफल जारी छ।

कोरोना भाइरसबारे नागरिकलाई जानकारी गराउन सरकारले आजदेखि कल सेन्टरमा अर्को नम्बर थप गरेको छ।

थप गरिएको कल सेन्टरको नम्बर ११३३ हो। इपिडिमियोलोजी शाखामा १११५ नम्बरको कल सेन्टर सञ्चालन हुँदै आएको छ। यसअघि सञ्चालन गरिएको नम्बरमा दैनिक ६ हजारभन्दा बढी गुनासा तथा जनाकारी आउने गरेको थियो। कल सेन्टर २४ सै घण्टा सञ्चालन हुनेछ।