संक्रमित २ जनाको अवस्था सामान्य

काठमाडौं- कोरोना संक्रमण पुष्टि भएका २ जनाको अवस्था सामान्य रहेको स्वास्थ्य तथा जनसंख्या मन्त्रालयले जनाएको छ।

मन्त्रालयका प्रवक्ता डा. विकास देवकोटाले दुवै जनाको सहिद शुक्रराज ट्रपिकल तथा सरुवा रोग अस्पतालमा आइसोलेसनमा उपचार भइरहेको बताए। चैत ४ गते फ्रान्सबाट र ६ गते खाडी मुलुकबाट आएका २ जनाकाे उपचार भइरहेकाे छ।

देवकोटाका अनुसार उनीहरुको अवस्था सामान्य छ। हालसम्म ८ सय २ नमुना परीक्षण गरिएको छ। तीमध्ये ७९९ जनाको रिपोर्ट नेगेटिभ आएको प्रवक्ता देवकोटाले प्रस्ट पारेका छन्।

चैत १२ गतेपछि परीक्षण गरिएका कसैलाई पनि संक्रमण देखिएको छैन, प्रवक्ता देवकोटाले भने, अहिले उपत्यकाका टेकुमा ४, पाटन अस्पतालमा ६ र कान्ति अस्पतालमा ३ जना आइसोलेसनमा छन्।

विभिन्न प्रदेशमा आइसोलेसनमा रहेका व्यक्तिहरुको तथ्यांक संकलन भइरहेको छ।
कोरोना संक्रमणको पुष्टि भएका दुवै बिरामीका आफन्त सम्पर्कमा आएको र उनीहरु सरकारको निगरानीमा रहेको मन्त्रालयले जनाएको छ। तीमध्ये कसैलाई पनि कोरोनोको लक्षण नदेखिएको प्रवक्ता देवकोटाले बताए।