क्वारेन्टाइनबाट भागेका ११ जना प्रहरी निगरानीमा

सुर्खेत- सरकारी निर्देशन अवज्ञा गरेर भागेर गाउँ पुगेका ११ जनालाई सेल्फ क्वारेन्टाइनमा राखिएको छ। उनीहरुलाई प्रहरी र गाउँपालिकाको निगरानीमा राखिएको भेरी नगरपालिकाका प्रमुख चन्द्रप्रकाश घर्तीले जानकारी दिए।

उनीहरु केही समयअघि मजदुरीका लागि भारत गएका थिए। भारतमा कोरोना संक्रमण हुन थालेपछि फर्केका उनीहरुलाई नेपालगन्जस्थित महेन्द्र बहुमुखी क्याम्पसमा रहेको क्वारेन्टाइनमा राखिएको थियो। तर उनीहरु क्वारेन्टाइनबाट भागेका थिए।

‘१४ दिनसम्म परिवारबाट टाढै बस्न आग्रह गरेका छौं। उनीहरुलाई प्रहरीले उनीहरुको निगरानी गरिरहेको छ। कोरोनाको लक्षण देखिए तत्काल क्वारेन्टाइनमा राखेर उपचार थाल्न जिल्ला अस्पताललाई निर्देशन दिएका छौं’ जाजरकोटका प्रमुख जिल्ला अधिकारी जनकराज पन्तले भने, ‘जिल्लाबाट मजदुरीका लागि भारत गएकाहरु फर्केकाले केही दिन सचेत रहन परिवार, छिमेक र गाउलेहरुलाई निर्देशन दिएका छौं।'

सरकारी निर्देशन अवज्ञा गर्दै भागेर आएका उनीहरुलाई केही दिन परिवारको सम्पर्कबाहिरै बस्न र सेल्फ क्वारेन्टाइनमा रहन निर्देशन दिएको घर्तीले बताए।