उपत्यकाबाट ७०८ सवारीसाधन नियन्त्रणमा

काठमाडौं– ‘लकडाउन’को अवधिमा उपत्यकाका विभिन्न स्थानबाट अनुमति (पास) नलिई सञ्चालन भएका सात सयभन्दा बढी सवारीसाधनलाई नियन्त्रणमा लिइएको छ।

महानगरीय ट्राफिक प्रहरी महाशाखाले बुधबार बिहान १० बजेसम्म अनुमति नलिई सञ्चालन भएका सात सय आठ सवारी साधन नियन्त्रणमा लिएको जनाएको छ।

महाशाखाकाका प्रवक्ता एसपी जीवनकुमार श्रेष्ठले ‘लकडाउन’मा अटेर गरी सञ्चालन गरिएका सवारी साधनलाई पहिलो दिन (मंगलबार) सम्झाई बुझाई छोडिए पनि दोस्रो दिन नियन्त्रणमै लिएको बताए।

यस्तै, प्रहरीले घरबाट अनावश्यकरूपमा निस्केका सर्वसाधारणलाईसमेत सम्झाई बुझाई गरी घरतर्फ फर्काउने गरेको जनाएको छ।

सरकारले ‘लकडाउन’मा अत्यावश्यक सेवा र अनुमति लिएका सवारी साधन मात्रै चल्न दिने व्यवस्था गरेको छ।

विश्वभर महामारीकारूपमा फैलिरहेको कोरोना भाइरस (कोभिड–१९) संक्रमण फैलन नदिन सरकारले मंगलबारदेखि एक सातासम्म देशभर ‘लकडाउन’ गरेको हो।