कोरोनाबाट दक्षिण एसियामा १५ को मृत्यु, १३३७ संक्रमित

काठमाडौं- विश्वव्यापी महामारीको रुपमा फैलिएको कोरोना भाइरसको संक्रमण दक्षिण एसियामा पनि तिब्र गतिमा फैलिएको छ ।

अघिल्लो एक हप्ता अघिसम्म खासै असर नदेखिएको दक्षिण एसियाली मुलुकहरुमा पछिल्लो एक हप्तामै १ हजार ३ सय ३७ जना संक्रमित भएका छन् भने १५ जनाको मृत्यु भएको छ ।

कोरोनाको संक्रमण दक्षिण एसियमा सबैभन्दा बढि पाकिस्तानमा फैलिएको छ । पाकिस्तानमा मात्रै ७७६ जनामा संक्रमण भएको पुष्टि भएको छ भने ५ जनाको मृत्यु भएको वर्डओमिटरले जनाएको छ ।

दोस्रोमा भारत देखिएको छ । जहाँ ३९६ जना संक्रमित भेटिएका छन् भने ७ जनाको मृत्यु भएको छ । अफगानिस्तामा ४० जना संक्रमित भएका छन् भने एक जनाको मृत्यु भएको छ । बंगलादेशमा २७ जना कोरोनाबाट संक्रमित हुँदा २ जनाको मृत्यु भएको छ ।

श्रीलङ्का, माल्दिभ्स, भुटान र नेपालमा हालसम्म कोरोना संक्रमणका कारण मानवीय हताहती भएको छैन । श्रीलङ्कामा ८२ जना संक्रमित भएका छन् भने माल्दिभ्समा १३ जनामा कोरोना देखिएको छ । भुटानमा दुई जनामा संक्रमण भेटिएको वर्डओमिटरले जनाएको छ ।

नेपालमा भने अहिलेसम्म एक जनामा मात्रै कोरोना संक्रमण भेटिएको छ । संक्रमित युवा उपचारपछि पूर्णरुपमा निको भएर घर फर्किएका छन् ।