कोरोना संक्रमणबाट रियल मड्रिडका पूर्वअध्यक्ष सान्जको निधन

मड्रिड– कोरोना भाइरस (कोभिड–१९)बाट स्पेनिस क्लब रियल मड्रिडका पूर्वअध्यक्ष लोरेन्जो सान्जको निधन भएको छ। कोरोना भाइरसको संक्रमण देखिएपछि अस्पताल भर्ना गरिएका सान्जको शनिबार राति निधन भएको परिवारले जनाएको छ।

७६ वर्से सान्ज सन् १९९५ बाट २००० सम्म बर्नाबेउमा अध्यक्ष थिए। त्यसअवधिमा रियल मड्रिडले दुईपटक च्यम्पियन्स लिग जितेको थियो।

“मेरो बुबा रहनुभएन,” सान्जका छोराले सामाजिक सञ्जाल ट्विटरमा लेखेका छन्, “उहाँ एक राम्रो, प्रेरक र मेहेनती मानिस हुनुहुन्थ्यो। तर, यस्तो निधन उहाँका लागि योग्य भएन। बुवाको मृन्युले हाम्रो परिवार र रियल मड्रिडलाई मर्माहत बनाएको छ।”

३३ पटकको स्पेनिस लिग विजेता रियलका लागि सान्जले राबर्टो कार्लोस, क्लियरेन्स सिडोर्फ, डेभर बुकेरजस्ता खेलाडीलाई अनुबन्धन गरेका थिए।

उनले सन् २००० को चुनावमा फ्लोरेन्टिनो पेरेजसँग हार बेहोरेपछि रियल मड्रिडबाट बाहिरिएका थिए।

उनका छोरा फर्नान्डोले रियलमा चार सिजन खेलेका थिए।