कोरोनाको डरले घर फर्किंदा बाटोमै बाबु छोराको मृत्यु, आमाको अवस्था गम्भीर

काभ्रे- कोरोना भाइरसको त्रासका कारण घर फर्किएका एक परिवार सवार मोटरसाइकललाई मिनिट्रकले ठक्कर दिँदा काभ्रेको बनेपामा बाबुछोराको मृत्यु भएको छ।

बनेपाबाट साँगातर्फ जाँदै गरेको बा ५ ख २३९० नम्बरको मिनी ट्रक र विपरीत दिशाबाट आउँदै गरेको बा ५७ प ७२८ नम्बरको मोटरसाइकल एक आपसमा ठोक्किँदा मोटरसाइकलमा सवार बाबुछोराको मृत्यु भएको हो ।

आइतबार बिहान भएको दुर्घटनामा परेर उदयपुर जिल्ला रौतमाई गाउँपालिका–४ का ३५ वर्षीय मिनबहादुर श्रेष्ठ र उनका ५ वर्षीय छोरा सुविन श्रेष्ठको मृत्यु भएको प्रहरीले जनाएको छ ।

मृतककी श्रीमती सुनीता श्रेष्ठ घाइते छन् । उनको बनेपास्थित शीर मेमोरियल अस्पतालमा उपचार भइरहेको प्रहरीले जनाएको छ ।

कोरोनाको डरको कारण घर जान लागेका उनीहरुलाई काभ्रे जिल्लाको बनेपा नगरपालिका–१३ स्थित भैंसेपाटीमा मिनिट्रकले ठक्कर दिएको थियो । ठक्कर दिने मिनिट्रक र चालकलाई नियन्त्रणमा लिइएको प्रहरीले जनाएको छ ।