लुम्बिनीमा जसपाबाट निर्मला मुडभरी भट्टराईको शपथ

बुटवल– जनता समाजवादी पार्टी (जसपा) को समानुपातिकमा सिफारिस रुपन्देहीकी निर्मला मुडभरी भट्टराईले लुम्बिनी प्रदेशसभा सदस्यको शपथ लिएकी छन्। लुम्बिनी प्रदेशसभाका सभामुख पूर्णबहादुर घर्तीले बुधबार एक कार्यक्रमका बीच प्रदेशसभा सदस्य भट्टराईलाई शपथ गराएका हुन्। 

जसपाले लुम्बिनी प्रदेशसभा सदस्य कल्पना पाण्डे लम्सालले पार्टीको ह्वीप उल्लघन गरेको भन्दै कारवाही गरेपछि पद रिक्त भएको थियो। जनता समाजवादी पार्टीको गत साउन ३२ गते केन्द्रीय कार्यकारिणी बैठकको निर्णय अनुसार बन्दसूची उम्मेदवारमध्येबाट निर्मलालाई आयोगको भदौ १० गते बैठकले रिक्त पदमा निर्मलालाई निर्वाचित गरेको पत्र प्रदेशसभामा पठाएको थियो। शपथ लिएपछि सञ्चारकर्मीसँग कुरा गर्दै आफू जनताको सेवामा समर्पित हुने बताइन्। 

जसपाले एमालेका शंकर पोखरेल नेतृत्वको सरकारमा मन्त्री भएको भन्दै पाण्डे सहित सन्तोष कुमार पाण्डेय, विजयबहादुर यादवलाई कारबाही प्रदेशसभा सदस्यबाट निलम्बन गरेको थियो। जसपाले कारवाही गरेका अन्य २ जना भने प्रत्यक्ष निर्वाचित भएका हुन्। निर्मलाको शपथ भएसँगै लुम्बिनीमा प्रदेशसभा सदस्यको संख्या ८१ कायम भएको छ।