मोरङमा ८ जनप्रतिनिधिले मात्रै रोजे नेकपा एकीकृत समाजवादी

विराटनगर- माधवकुमार नेपाल नेतृत्वको नेकपा एकिकृतमा मोरङका ८ जना जनप्रतिनिधिले सनाखत गरेका छन्। मंगलबार साँझ ५ बजेसम्म ४ जना वडाध्यक्ष र ४ जना सदस्यले सनाखत गरेको प्रदेश १ निर्वाचन कार्यालयले जनाएको छ। 

नेकपा एमाले छाडेर समाजवादी रोज्‍नेमा उर्लाबारी नगरपालिका १ का वडाध्यक्ष मचिन्द्रकुमार कार्की, रतुवामाई नगरपालिका १० का वडाध्यक्ष टंक ढकाल, बुढीगंगा गाउँपालिका ४ का वडाध्यक्ष कासिम मियाँ , बुढीगंगा ५ का वडाध्यक्ष रमेशकुमार खनाल रहेका छन् । अन्य ४ जना वडासदस्यले समाजवादीमा सनाखत गरेको बताईएको छ।

मोरङमा नेकपा एमालेबाट २४३ जनप्रतिनिधि निर्वाचित भएका थिए। १७ बटा स्थानीय तह मध्ये ५ वटा स्थानीय तहको प्रमुख र ९ वटा स्थानीय तहको उपप्रमुखमा एमालेबाट निर्वाचित भएका थिए। १४ जना स्थानीय तहका प्रमुख तथा उपप्रमुखले समाजवादी रोजेनन्। यसअघि समाजवादीमा खुल्दै आएका २ जना स्थानीय तह प्रमुख र १ उपप्रमुखले एमालेमै रहने निर्णय गरेको बताएका छन्।

 समाजवादीमा सनाखत गरेका उर्लाबारी १ का वडाध्यक्ष मचिन्द्रकुमार कार्कीले कुर्सी र पद मात्रै सवै नभएको बताए। उनले भने,‘पार्टी विधि र पद्धती अनुसार चल्नुपर्ने हो, नचलेपछि समाजवादीमा सनाखत गरे।’