म्यान्चेस्टर डर्बीमा युनाइटेडको जित

लन्डन– इंग्लिस प्रिमियर लिग (ईपीएल)अन्तर्गत आइतबार राति सम्पन्न म्यान्चेटर डर्बीको खेलमा युनाइटेडले जित निकालेको छ।

म्यान्चेस्टर युनाइटेडको घरेलु मैदान ओल्ड ट्राफोर्डमा भएको खेलमा म्यान्चेस्टर सिटी २–० गोल अन्तरले पराजित भयो।

युनाईटेडले पहिलो हाफमा एक गोलको अग्रता बनाएको थियो। उसका लागि मार्टिएलले गोल गरे। खेलको ३० औं मिनेटमा ब्रुनो फर्नान्डेसले दिएको पासलाई मार्टिएलले गोलमा बदलेका थिए।

दोस्रो हाफमा पनि सिटीले गोल गर्न सकेन। युनाइटेडका म्याक टोमिनेले खेलको अन्तिम मिनेटमा गोल गरेर युनाइटेडलाई २–० को जित दिलाएका थिए।

२९ औं चरणको खेलसँगै युनाइटेडले १२ जित र ९ बराबरीका साथ ४५ अंक बनाएको छ। ऊ लिग तालिकाको पाँचौ स्थानमा छ। लिगको दोस्रो स्थानमा रहेको सिटीको ५७ अंक छ। सिटी शीर्षस्थानको लिभरपुलभन्दा २५ अंकले पछि छ।

चेल्सीको सानदार जित

ईपीएलकै अर्को खेलमा चेल्सीले सानदार जित निकालेको छ। उसकै घरेलु मैदानमा एभर्टोनलाई हराउँदै जित सुनिश्चित गरेको हो।

घरेलु टोलीले पाहुना टिमलाई ४–० को गोल अन्तरले हराएको हो। जितका लागि माउन्ट, प्रेदो, विलियम र जिरोउडले गोल गरे। उनीहरूले क्रमशः १४, २१, ५१, ५४ औं मिनेटमा गोल गरेका थिए।

जितसँगै चेल्सीको खातामा ४८ अंक भएको छ। ऊ लिग तालिकाको चौथो स्थानमा हुँदा एभर्टोन ३७ अंकका साथ १२ औं स्थानमा छ।