होलीमा दिन घमाइलो हुने

काठमाडौं– मौसम पूर्वानुमान महाशाखाले आगामी दुई दिन देशका अधिकांश भूभागमा मौसम सफा रहने जनाएको छ। महाशाखाले आज (आइतबार) जारी गरेको मौसम पूर्वानुमान बुलेटिनमा आज र भोलि मौसम सफा रहने उल्लेख छ।

महाशाखाका अनुसार आज दिउँसो देशको पूर्वी र पश्चिमी पहाडी भू–भागमा आंशिक बदली रही बाँकी भू–भागमा मौसम सामान्यतया सफा रहनेछ। पूर्वी र पश्चिमी पहाडी भू–भागका एक–दुई स्थानमा क्षणिक वर्षाको सम्भावना रहेको महाशाखाले जनाएको छ।

यस्तै, आज राति देशको पहाडी भू–भागमा आंशिक बदली रही बाँकी भू–भागमा मौसम सामान्यतया सफा रहने महाशाखाले जारी गरेको बुलेटिनमा उल्लेख छ।

भोलि (सोमबार) दिउँसो देशको पूर्वी भू–भागमा आंशिकदेखि सामान्य बदली रही मध्य भू–भागमा आशिंक बदली रहने र बाँकी भू–भागमा मौसम सामान्यतया सफा रहने महाशाखाको प्रक्षेपण छ।

महाशाखाका अनुसार पहाडी भू–भागका एक–दुई स्थानमा क्षणिक वर्षाको सम्भावना छ। यस्तै, भोलि राति देशको पूर्वी र मध्य पहाडी भू–भागमा आंशिक बदली रही बाँकी भू–भागमा मौसम सामान्यतया सफा रहने छ।

होली पर्व देशका पहाडी जिल्लामा भोलि र तराईका जिल्लामा पर्सि मनाइँदैछ।