लिभरपुल २२ वटा होम खेलमा अपराजित

लन्डन । इंग्लिस क्लब लिभरपुलले लगातार २२ वटा होम खेलमा जित निकाल्ने क्लबको रेकर्ड राखेको छ। उसले शनिबार राति बर्नमाउथलाई अनिफिल्डमा हराउँदै उक्त रेकर्ड राखेको हो।

लिभरपुलको घरेलु मैदानमा उसले पाहुना टोलीलाई २–१ को गोल अन्तरले हराएको हो। उसले मोहम्मद सलाह र साडियो मानेको गोलमा जित निकालेको हो।

सुरुवातमै एक गोलले पछि परेको लिभरपुलका तर्फबाट सलाहले २५ औं मिनेटमा गोल गर्दै खेललाई बराबरीमा ल्याएका थिए। उनले खेललाई बराबरीमा ल्याएको ८ मिनेटमै मानेले अर्को गोल थप्दै टिमलाई अग्रता दिलाएका थिए।

खेलको नवौं मिनेटमा बर्नमाउथका कलुम विल्सनले गोल गर्दै पाहुना टोलीलाई अग्रता दिलाएका थिए। उनको गोलपछि लिभरपुलले २ गोल थपेर पहिलो हाफ सकिँदै २–१ को नतिजा बनाएको थियो।

तर, दोस्रो हाफमा गोल हुन नसकेपछि लिभरपुलले खेल आफ्नो पोल्टामा पारेको थियो। लिभरपुल लिग उपाधिबाट तीन जितले मात्र टाढा रहेको छ।

जितसँगै लिग लिडर लिभरपुलले २९ खेलमा ५ अंकमात्र गुमाएर ८२ अंक बनाएको छ। उता बर्नमाउथको २७ अंक मात्र छ। उ तालिकाको पुछारबाट तेश्रो स्थानमा छ।