काठमाडौंसहित देशका केही स्थानमा बिहानैदेखि वर्षा

काठमाडौं - पश्चिमी वायु र स्थानीय वायुको प्रभावले आज बिहानै देखि काठमाडौं उपत्यकालगायत देशका केही स्थानमा वर्षा भइरहेको मौसम पूर्वानुमान महाशाखाले जनाएको छ। महाशाखाले हाल देशको पश्चिमी भू-भागमा सामान्य देखि पूर्ण बदली रही बाँकी भू-भागमा आंसिक देखि सामान्य बदली रहेको जनाएको छ। देशको पश्चिमी भू-भागका केहि स्थान र मध्य तथा पू्र्वी भू-भागका केही स्थानमा वर्षा भइरहेको छ।

आज आंशिकदेखि सामान्य बदली रही देशको धेरै जसो स्थानमा मेघ गर्जन चट्याङ र हावाहुरीसहित वर्षाको सम्भावना रहेको महाशाखाले जनाएको छ। आज दिउँसो देशभर सामान्य बदली रही देशका केही स्थानहरुमा मेघगर्जन/चट्याङ्/ हावाहुरी/ असिनासहित वर्षाको सम्भावना रहेको छ। उच्च पहाडी तथा हिमाली भू-भागका केही स्थानहरुमा हल्का देखि मध्यम हिमपातको सम्भावना रहेकोले सतर्कता अपनाउन पनि महाशाखाले आग्रह गरेको छ।

पश्चिमी वायु र स्थानीय वायुको प्रभाव पश्चिमी भेगमा बढी पर्ने जनाइएको छ। यस्तै आइतबार देशको पूर्वी भू-भागमा आंसिकदेखि सामान्य बदली रही बाँकी भू-भागमा मौसम सामान्यतया सफा रहनेछ। पूर्वी पहाडी भू-भागका एक/दुई स्थानमा र पश्चिमी पहाडी भू-भागका एक-दुई स्थानमा क्षणिक वर्षाको सम्भावना रहेको महाशाखाले जानकारी दिएको छ।