कार्यसम्पादन राम्रो नभएपछि युक्रेनी राष्ट्रपतिद्वारा सबै मन्त्री बर्खास्त

काठमाडौं- युक्रेनका राष्ट्रपति भोलोदिमिर जेलेन्स्कीले खराब कार्यसम्पादन र भ्रष्टाचारको आरोप लागेपछि आफ्नो मन्त्रिपरिषदका सबै मन्त्री बर्खास्त गरिदिएका छन् ।

यसका साथै उनले आफ्नो मन्त्रिमण्डलमा रहेका व्यक्तिलाई कुनै पनि अन्तर्राष्ट्रिय कम्पनीमा जान अयोग्य घोषणा गरेका छन् ।

जसमा स्वास्थ्य मन्त्री जोरयाना स्कालेत्सका पनि छन्, जो चीनबाट फर्किएपछि कोरोनाभाइरसको आशंकामा आइसोलेशनमा राखिएको थियो ।

राष्ट्रपति जेलेन्स्कीले संसदमा सम्बोधनका क्रममा यसरी मन्त्रिपरिषदका सबै सदस्य बर्खास्त गर्नु आफ्नो बाध्यता रहेको बताएका छन् । उनले मन्त्रीहरु पश्चिमी देशहरुको गुलाम बनेको आरोप लगाए । पश्चिमा देशहरु आर्थिक सहयोगका नाममा देशमा घुसपैठ गरेको राष्ट्रपति जेलेन्स्कीको आरोप छ ।

आफ्नो सम्बोधनका क्रममा जेलेन्स्कीले भने, ‘हाम्रा अन्तर्राष्ट्रिय सहयोगीलाई सम्मान छ र उहाँहरुले दिएको सहयोगप्रति धन्यवाद दिँदै म यो भन्न चाहन्छु कि हाम्रा कम्पनीका सञ्चालकहरु भएर काम गरेका हाम्रो देशका नागरिकहरु एक जातीय अल्पसंख्यकजस्तो महशुस गरिरहेका छन् ।

हाम्रो मन्त्रीहरुको प्रदर्शन कमजोर बनेको छ । तर एउटा आशा लाग्दो कुरा के छ भने यो ६ महिनाको अवधिमा कम्तीमा कसैले भ्रष्टाचार गरिसक्न भने पाएको छैन ।’

भ्रष्टाचारको अन्त्यका लागि साथीको बैंकलाई राष्ट्रियकरण

जेलेन्स्कीले अन्तर्राष्ट्रिय मुद्रा कोषको सहयोग रहेको एउटा बैंकलाई राष्ट्रियकरण गरेका छन् । जसमा उनका नजिकका साथी ईहोर कोलोमोइस्कीले नेतृत्व गरेका थिए ।

उनी युक्रेनका मिडिया तथा बैंकिङ टाइकुन हुन् । आईएमएफले सहयोगका लागि बैंकको बोर्डमा विदेशी सदस्यहरुलाई स्वतन्त्र निर्देशकका रुपमा सहभागी गराउनु पर्ने सर्त राखेको थियो ।

जेलेन्स्कीले यो कुरा अस्वीकार गरे र त्यहाँ अनियमितता हुन सक्ने आशंकामा बैंकलाई नै राष्ट्रियकरण गरिदिए ।

जेलेन्स्कीको लोकप्रियता

जेलेन्स्की युक्रेनका चर्चित हाँस्यकलाकार हुन् । गत वर्ष भएको निर्वाचनबाट दुई तिहाई बढी मत प्राप्त गर्दै देशको राष्ट्रपति बने ।

उनको केर्वटल–९५ भन्ने एउटा इन्टरटेन्मेन्ट कम्पनी छ । यसको टिभी सिरिएल ‘सर्भेन्ट अफ द पिपुल’ मा जेलेन्स्कीले राष्ट्रपतिको भूमिका निर्वाह गरेका थिए ।

गत वर्ष सन् २०१९ मा भएको राष्ट्रपतीय निर्वाचनमा उनले ७३.२२ प्रतिशत मत प्राप्त गरेका थिए ।