सिंगापुरसँग खेल्न पाएन नेपालले, खेल रद्द भएपछि अंक बाँडियो

काठमाडौं– नेपाल र सिंगापुरबीचको खेल रद्द भएको छ। थाइल्यान्डको टेर्डथाई क्रिकट मैदानमा हुने भनिएको खेल वर्षाका कारण प्रभावित भएपछि रद्द गरिएको हो।

थाइल्यान्डको बैंककमा एसीसी इस्टर्न रिजन टी–२० अन्तर्गत नेपालले आज अन्तिम खेलमा सिंगापुरसँग प्रतिष्पर्धा गर्ने तय थियो। तर, गए राति परेको झरीले मैदान ओसिलो भएपछि अफिसियलले खेल हुन नसक्ने बताए।

अन्तिम खेल रद्द भएसँगै नेपालले सिंगापुरसँग १–१ अंक बाँडेको छ। प्रतियोगितामा सिंगापुरले तीन खेल जितेर एक अंक बाँड्दै ७ अंक बनाएको छ भने नेपालले दुई हार, एक जित र एक खेलमा अंक बाँड्दै ३ अंक जोडेको छ।

प्रतियोगितामा सिंगापुर एसिया कप छनोटका छानिसकेको छ भने नेपाल बाहिरिसकेको छ। सुरुवातका दुई खेलमा मलेसिया र हङकङसँग पराजित भएपछि नेपाल प्रतियोगिताबाट बाहिरिएको हो। नेपालले आफ्नो तेस्रो खेलमा भने थाइल्यान्डलाई हराएको थियो।

प्रतियोगिताको अन्तिम खेलमा आज सोही मैदानमा मलेसिया र हङकङ प्रतिस्पर्धा गर्दै छन्।