संखुवासभा हत्या प्रकरण : ६ वटै शव पोस्टमार्टमका लागि धरान पठाइयो

विराटनगर– संखुवासभामा हत्या गरिएका एकै परिवारका ६ जनाको शव पोस्टमार्टमका लागि धरान पठाइएको छ। मादी नगरपालिका–१ उम्लिङबाट मंगलबार दिउँसो ६ जनाकै शव धरानस्थित बिपी स्वास्थ्य विज्ञान प्रतिष्ठानमा पठाइएको प्रहरीले जनाएको छ। 

‘पोस्टमार्टमका लागि शव धरान लगिएको छ’,  १ नम्बर प्रदेश प्रहरी कार्यालय विराटनगरका प्रवक्ता एसपी नवीनराज राईले  भने। शवलाई  गाडीमा हालेर अस्पताल लगिएको छ। संघीय एकाइ प्रहरी कार्यालय धरानबाट प्रहरी उपरीक्षक भीम दाहालको नेतृत्वमा टोली खटिएको थियो। तालिमप्राप्त कुकुरसहितको टोली सोमबार साँझ पुगेको थियो। प्रहरीले मुचुल्का उठाएर शव पोस्टमार्टमका लागि पठाएको राईले बताए। 

मादी-१ का कार्की परीवारको हत्या पैसाका कारण भएको हुन सक्ने देखिएको वडाध्यक्ष खेमनाथ कटुवालले बताएका छन्। प्रहरीको अनुसन्धान जारी रहे पनि परिवारका सदस्य र छिमेकीसँगको कुरा बुझ्दा झापामा घडेरी खरिदका लागि जम्मा गरेको पैसा लुट्नकै लागि हत्या भएको देखिन आएको उनले बताए। कटुवालले भने, ‘प्रहरीको अनुसन्धानबाट केही निष्कर्ष निस्केला। तर, अहिलेसम्मको अध्ययनले त्यही देखाएको छ।’ प्रहरीले घरभित्रको अनुसन्धान गरेपछि केही तथ्य आउने उनले बताए। 

मादी- का ८४ वर्षीया पार्वती कार्की, ५२ वर्षीय तेज बहादुर कार्की, ५२ वर्षीया कमला कार्की, ३२ वर्षीया रञ्जना कार्की, ११ वर्षीय दिपेन कार्की र ७ वर्षीया गोमा कार्कीको हत्या गरिएको अवस्थामा सोमबार बिहान स्थानीयले शव फेला पारेका थिए। 

सात जनाको परिवारमा बस्दै आएकामा ९३ वर्षीय बाबु बौद्धमान कार्की मात्र सकुशल छन्। उनी आँखा राम्रोसँग देख्दैनन् भने कान पनि राम्रोसँग सुन्दैनन्। उनले बिहान मात्र घटनाबारे थाहा पाएको बताएका छन्। साँझ ६ वजे खाना खाएर सुतेको उनले बताएका छन्। बिहान छिमेकीले भन्दा मात्र आफूले घटनाबारे थाहा पाएको कार्कीले बताएका छन्।