ओलम्पिक क्वालिफाईङ्गमा नेपालको विजयी शुरुवात

एजेन्सी- ओलम्पिक २०२० एसिया–ओसियाना बक्सिङ्ग क्वालिफाईङ्ग ईभेन्टमा नेपालका मुक्केवाज सनिल शाही ६३ केजी तौल समूहमा विजयी भएका छन्।

उनी किर्गीस्तानका मुक्केवाज काट्रेवेक उलु अर्जेनलाई ४–१ को अन्तरले पराजित गर्दै स्पिलिट डिसिजनको आधारमा विजयी भएका हुन्।

जोर्डनको अमान शहरमा भईरहेको खेलमा सनिलले पहिलो राउण्ड २–३ को आधारमा हार व्यहोरे पनि ५–० अंकले दोश्रो राउण्डलाई आफ्नो पक्षमा पार्न सफल भए। उनले तेश्रो राउण्ड आफ्नो पक्षमा पारी किर्गीस्तानका नम्बर १ खेलाडीलाई पराजित गरे।

सनिलको अर्काे भिडन्त एसियाका बक्सिङ्कको नम्बर वान वरियताका उन्मोनोव भकोडैर मार्च ५ मा हुनेछ। मार्च ५ मा हुने उक्त खेल जित्न सके सनिल ओलम्पिक क्वालिफाईङ्ग हुने सम्भावना अत्याधिक रहेको छ।

यसअघि कुनै पनि ओलम्पिक क्वालिफाईङ्ग खेलमा नेपाली खेलाडीहरुले आफ्नो जित निकाल्न सकेका छैनन्।

त्यस्तै ओलम्पिक क्वालिफाईङ्गमा सहभागी नेपालकी खेलाडी मिनु गुरुङ्गले मार्च ४ मा कोरीयाको खेलाडी इम ऐसँग ५७ केजी तौल समुहमा आफ्नो चुनौती पेश गर्नेछिन्।