भारतमा फैलियो कोरोना : एकै परिवारका ६ जनामा संक्रमण

एजेन्सी- भारतको उत्तर प्रदेशस्थित आगरामा एकै परिवारका ६ जनामा कोरोनाभाइरस संक्रमण पुष्टि भएको छ।

सोमबार एकै परिवारका १३ जनाको नमूना जाँच गरिएकोमा ६ जनामा संक्रमण पुष्टि भएको हो। बाँकी सदस्यहरुलाई पनि आइसोलेशन वार्डमा भर्ना गरिएको छ।

आगरा निवासी जुता कारोबारीका दाजुभाइ दिल्ली बस्ने नातेदारसँग इटली भ्रमण गरेर गत फेब्रुअरी २५ मा भारत फर्किएका थिए।

दिल्लीका नातेदारमा कोरोना संक्रमण आइतबार नै पुष्टि भएको थियो।

एकजनामा कोरोना संक्रमण पुष्टि भएपछि आगराका जुता व्यापारी आफ्ना दुइ भाइसहित परिवारका सबै सदस्य लिएर सोमबार साँझ जिल्ला अस्पताल पुगेर नमूना परीक्षण गराएका थिए।

तत्कालै एसएन मेडिकल कलेजको माइक्रो बायोलोजी विभागको टिमले नमूना परीक्षण गरेको थियो।

जसमध्ये ६ जनामा संक्रमण पुष्टि भएको छ।

जिल्ला अस्पतालका डा.एसके वर्माका अनुसार कोरोना पुष्टि भएका सबैलाई दिल्ली रेफर गरिएको छ।

६ जनामा संक्रमण पुष्टि भएपछि उनीहरुले यो बीचमा भेट गरेका आफन्तहरुको पनि स्वास्थ्य परीक्षण गर्न थालिएको छ।

मंगलबार १० जना भन्दा बढी व्यक्तिले अस्पतालमा नमूना दिएका छन्।

स्वास्थ्य मन्त्रालयको टोली आगरा पुगेर अनुसन्धान सुरु गरेको भारतीय सञ्चारमाध्यमहरुले जनाएका छन्।

भारतमा सोमबार मात्रै तीनजनामा संक्रमण पुष्टि भएको थियो। उनीहरुको उपचार सुरु भएको छ।

त्यसअघि पनि तीनजनामा संक्रमण पुष्टि भएकोमा उनीहरु उपचारपछि घर फर्किएका थिए।