कोरोनाबाट इरानका सर्वोच्च नेताका सल्लाहकारकै मृत्यु

कोरोना भाइरसका कारण इरानका सर्वोच्च नेता आयातोल्लाह अली खामेनेइका सल्लाहकारको समेत मृत्यु भएको छ। ७१ वर्षीय मोहम्मद मिरमोहमम्द्दीको सोमबार मृत्यु भएको हो ।

कोरोनाले भयावह रुप लिएको इरानमा अहिलेसम्म पन्ध्रसय बढि संक्रमित भएका छन् भने ६६ जनाको मृत्यु भएको छ । यसअघि, इरानका प्रमुख धर्मगुरुमध्ये एक रहेका हादी खोस्रोसाहीको बिहीबार कोरोना भाइरसकै संक्रमणबाट मृत्यु भएको थियो ।

यस्तै इरानकी उपराष्ट्रपति मोसुमेह इब्तेकार र उपस्वास्थ्यमन्त्री इराज हारिर्ची पनि कोरोनाभाइरसबाट संक्रमित बनेका छन् ।

हारिर्चीले कोरोनाभाइरसविरुद्ध गठन गरिएको सरकारी टास्कफोर्सको नेतृत्व गरिरहेका थिए ।

उच्च पदस्तहरुलाई नै कोरोनाको संक्रमण देखिन थालेपछि इरानका नागरिक आतंकित भएका छन् । सरकारले कोरोनाको रोकथाम गर्न प्रभावकारी कदम नचालेको उनीहरुको गुनासो छ ।

मध्यपूर्वमा इरानमा सबैभन्दा बढी कोरोनाभाइरसको संक्रमण देखिएको छ । त्यस्तै, भाइरसको उत्पत्ति भएको चीनबाहिर इरानमा नै सबैभन्दा बढीले ज्यान गुमाएका छन् ।