कोरोना संक्रमित ४५ हजार बिरामी घर फर्किए

काठमाडौं- कोरोना संक्रमण देखिएका ४५ हजार बिरामी उपचारपछि घर फर्किएका छन्।

वर्ल्डमिटर डट इन्फोका अनुसार विश्वभरका ८९ हजार ७५ कोरोना संक्रमितमध्ये ४५ हजार एक सय २३ बिरामी उपचारपछि घर फर्किएका छन्।

कोरोनाको केन्द्रविन्दु मानिने चीनका ८० हजार २६ संक्रमितमध्ये ४४ हजार चार सय ९९ बिरामी घर फर्किएका वर्ल्डमिटर डट इन्फोमा उल्लेख छ।

चीनपछि इरानमा उपचारपछि घर फर्किने बढी छन्। इरानमा नौ सय ७८ जनामा कोरोना संक्रमित भएकोमा एक सय ७५ उपचारपछि घर फर्किएका छन्। यस्तै, इटालीमा ८३, सिंगापुरमा ७४, जापानमा ४२, दक्षिण कोरियामा ३० बिरामी पनि उपचारपछि घर फर्किएका छन्। 

तीन हजारभन्दा बढीको मृत्यु

चीनको हुबेई प्रान्तको वुहान सहरमा गत डिसेम्बरमा देखिएको कोरोना भाइरसको संक्रमणबाट अहिलेसम्म तीन हजार ५३ को ज्यान गइसकेको छ।

मृत्यु हुनेमा चीनमा सबैभन्दा बढी दुई हजार नौ सय १२ छन्। त्यस्तै, इरानमा ५४, इटालीमा ४१, दक्षिण कोरियामा २२, जापानमा ६, फ्रान्स, हङकङ, अमेरिकामा दुई–दुई तथा थाइल्यान्ड, ताइवान, अस्ट्रेलिया, सान मारिनोमा एक–एक जनाको ज्यान गएको छ।

पछिल्लो समय कोरोना संक्रमण मध्यपूर्व तथा युरोपमा तीव्ररूपमा फैलिरहेको छ। १० दिनयता कोरोना संक्रमण ३७ देशमा देखिएको अन्तर्राष्ट्रिय समाचार संस्था सीएनएनले जनाएको छ।