सीपी मैनाली चढेको गाडी दुर्घटना

महोत्तरी– नेकपा मालेका महासचिव तथा पूर्व उपप्रधानमन्त्री सीपी मैनाली कार दुर्घटनामा परी घाइते भएका छन्।

वीपी राजमार्ग अन्तगर्त महोत्तरीको बर्दिवास- ३ कालापानीमा महासचिव मैनाली सवार गाडी दुर्घटनामा परेको हो।

गाडीमा मैनालीका छोरा, बुहारी, नाती र चालक समेत पाँच जना थिए। पाँचै जनालाई चोटपटक लागे पनि मैनाली र उनकी बुहारी गम्भीर घाइते रहेको ईलाका प्रहरी कार्यालय बर्दिबासले जानकारी दिएको छ।

प्रहरीका अनुसार मैनालीको टाउको र शरीरको अन्य भागमा गम्भीर चोट लागेको छ भने उनकी बुहारीको दुवै खुट्टा भाँचिएको छ। दुबै जनालाई हेलिकप्टरबाट काठमाडौं लैजाने तयारी गरिएको छ।

झापाबाट काठमाडौंतर्फ जाँदै गरेको मैनाली सवार बा ७ च २१२० नम्बरको कार र विपरीत दिशाबाट आउँदै गरेको ना ४ च ७६८० नम्बरको पिकअप जीप एक आपसमा ठोक्किएको थियो।

घाइतेहरुको अहिले बर्दिवासस्थित जनसेवा हस्पिटलमा उपचार भैरहेको छ।