एकदिवसीय वरीयतामा नेपालको एक स्थान सुधार

काठमाडौं– नेपालले एकदिवसिय अन्तर्राष्ट्रिय क्रिकेटको वरीयतामा एक स्थान सुधार गरेको छ।

अन्तर्राष्ट्रिय क्रिकेट परिषद् (आईसीसी)ले जारी गरेको नयाँ वरीयता क्रममा नेपाल १६ औं स्थानमा छ। यसअघि नेपाल १७ औं स्थानमा थियो।

नयाँ वरियतामा बेलायत शीर्ष स्थानमा छ। त्यस्तै, दोस्रोमा भारत र तेस्रोमा न्युजिल्यान्ड छ। दक्षिण अफ्रिका र अस्ट्रेलिया क्रमशः चौथो र पाँचौंमा छन्।

नामिबिया, युनाइटेड अरब इमिरेट्स (युएई), अमेरिका र पपुवा न्युगिनी नेपालभन्दा पछाडि छन्।

टी–२० मा भने नेपाल १२ औं स्थानमा यथावत् छ।

सन्दीप लामिछाने र करण केसीको स्थानमा परिवर्तन आएको छ। बलिङतर्फ सन्दीपले एक स्थान सुधार गर्दै ८४ औं स्थान पाएका छन् भने करणले एक स्थान सुधार गरेर ७४ औं स्थानमा पुगेका छन्।

सन्दीपले केही दिनअघि सम्पन्न नेपाल, अमेरिका र ओमन सम्मिलित त्रिकोणात्मक शृंखलामा ८ विकेट लिएका थिए भने करण एक खेलमा म्यान अफ दि म्याच भएका थिए।

शृंखलामा नेपालले अमेरिकाविरुद्धको दुई खेल जित्दा ओमनसँगका दुई खेलमा पराजित भएको थियो।