काठमाडौंमा टिप्परले फेरि लियो ज्यान, एकै महिनामा ७ जनाको मृत्यु

काठमाडौं- काठमाडौंमा टिप्परको ठक्करबाट फेरि अर्का एक व्यक्तिको मृत्यु भएको छ।

शङ्करापुर नगरपालिका ६ को धोला टोलमा टिप्परले ठक्करबाट स्थानीय बासिन्दा प्रविण श्रेष्ठको मृत्यु भएको हो ।
सोमबार राति ना १ क ४५६४ नम्बरको टिप्परको ठक्करबाट घाइते भएका श्रेष्ठको उपचारको क्रममा राति नै मृत्यु भएको प्रहरी जनाएको छ ।

ठक्कर दिने टिप्पर र चालकलाई प्रहरीले नियन्त्रणमा लिएको छ ।

केहिसमय यता टिप्पर आतंक झनै बढेर गएको छ । पछिल्लो एक महिनामा मात्रै टिप्परको ठक्करबाट सात जनाको मृत्यु भएको छ । गएको माघ २२ गते राति कंलकी अण्डरपासमा टिप्परको ठक्करबाट २ जनाको मृत्यु भएको थियो ।

त्यस्तै माघ महिनामै कैलाली, कञ्चनपुर, सुर्खेत, तनहुँ र नवलपरासीमा पनि टिप्परको ठक्करबाट मोटरसाइकल चालक र पैदलयात्रुको मृत्यु भएको छ ।

ट्राफिक नियम उल्लङ्घन गर्दै तीव्र गतिमा टिप्पर चलाउने गरेकै कारण यसबाट सर्वसाधरणको मृत्यु हुने गरेको भन्दै चर्को विरोध हुँदै आएको छ ।