जब सेल्टाका खेलाडीले जिदानेको मुखैमा किक हाने

बर्नाबेउ– आइतबार राति सम्पन्न खेलमा लिग लिडर रियल मड्रिडले १७ औं स्थानमा रहेको टोलीसँग बराबरी खेल्यो। घरेलु मैदान सेन्टियागो बर्नाबेउमा उसले सेल्टा भिगोसँग २–२ गोलको बराबरी खेलेको थियो।

संघर्षपूर्ण खेल चलिरहेको समयमा एक यस्तो समय आयो, दर्शकहरु खेलाडीलाई नभएर प्रशिक्षक जिनेदिन जिदानेलाई हेरिरहेका थिए। उनी सेल्टाका एक खेलाडीसँग मैदानमा लडे।

उनलाई सेल्टाका सेन्ट्रल ब्याक जेसेफ एडियोले लडाएका थिए। यो सबै त्यतिबेला भयो, जब एडियो बललाई साइडलाइनबाट बाहिर जानबाट रोकिरहेका थिए। तर, उनले रोक्न सकेनन् र चिप्लिए। साथै जिदानेसँग ठोक्किन पुगे।

लड्दा कारणवश उनले जिदानेको मुखमा प्रहार गर्न पुगे। तर, त्यो प्रहारले रियलका प्रशिक्षकको अनुहारमा चोट भने पुर्याएन।

घटना हुँदा रियल र सेल्टाले ६१ औं मिनेटको खेल खेलिरहेका थिए। एक एक गोलको बराबरीमा दुवै टालीले प्रतिस्पर्धा गरिरहँदा यस्तो भएको थियो।