मछिन्द्र बन्यो ‘ए’ डिभिजन लिगको नयाँ विजेता

काठमाडौं– कतार एयरवेज सहिद स्मारक ‘ए’ डिभिजन लिगको उपाधि मछिन्द्र क्लबले जितेको छ। जितसँगै मछिन्द्र ‘ए’ डिभिजन लिग जित्ने १६ औं क्लब बनेको छ।

राजधानीको त्रिपुरेश्वरस्थित दशरथ रंगशालामा शनिबार भएको लिगको अन्तिम खेलमा त्रिभुवन आर्मीलाई १–० ले हराउँदै मछिन्द्रले उपाधि जितेको हो।

खेलको ३३ औं मिनेटमा विकास तामाङले गरेको गोल मछिन्द्रका लागि निर्णायक बन्यो।  जितसँगै मछिन्द्रको १३ खेलबाट ३२ अंक भएको छ। त्रिभुवन आर्मी २९ अंकसहित दोस्रो बनेको छ।

मछिन्द्रले लिगका १० खेलमा जित र २ मा बराबरी खेल्दा १ मा पराजय भोगेको छ। त्रिभुवन आर्मीले भने ९ खेलमा जित र २ मा बराबरी तथा २ खेलमा हारको सामना गरेको छ।

‘ए’ डिभिजन लिगमा मनाङ मस्र्याङ्दी क्लबले सर्वाधिक ८ पटक उपाधि जितेको छ।

आशिष बने सर्वाधिक गोलकर्ता

लिगको सर्वाधिक गोलकर्तामा एपीएफ क्लबका आशिष लामा भएका छन्। उनले लिगमा ९ गोल गरेका छन्।

सर्वाधिक गोल गर्ने खेलाडीको दोस्रो स्थानमा च्यासल युथ क्लबका सन्तोष साहुखल छन्। उनले ७ गोल गरेका छन्।