कांग्रेस महामन्त्रीमा उम्मेदवारी घोषणा गर्दै प्रदीप पौडेल

काठमाडौं- नेपाली कांग्रेसका केन्द्रीय सदस्य प्रदीप पौडेलले आसन्न १४औँ महाधिवेशनमा महामन्त्रीमा उम्मेदवारी दिने बताएका छन्। वडा अधिवेशन सकिएपछि महामन्त्रीमा उम्मेदवारी घोषणा गर्ने उनले बताएका छन्। 

'महामन्त्रीमा उम्मेदवारी दिने निश्चित छ। अहिले वडा अधिवेशन जारी छ। वडा अधिवेशन सकिएपछि उम्मेदवारी घोषणा गर्छु,' पौडेलले भनेका छन्।

१३औँ महाधिवेशनमा पनि सिटौला समूहमा रहेका पौडेल १४औँ महाधिवेशनमा पनि उनैलाई साथ दिने तयारीमा छन्। १३औँ महाधिवेशनमा सिटौला समूहबाट महामन्त्रीको उम्मेदवार बनेका गगन थापा अहिले रामचन्द्र पौडेल समूहमा सक्रिय बनेका छन्।

पौडेल समूहले सभापतिको उम्मेदवार तय गरेको छैन। तर थापाले भने महामन्त्रीमा उठ्ने घोषणा गरिसकेका छन्। आगामी २४ भदौमा कांग्रेस प्रवक्तासमेत रहेका विश्वप्रकाश शर्माले पनि महामन्त्रीमा उम्मेदवारी घोषणा गर्ने तयारी गरेका छन्। उनले संस्थापन समूहबाट महामन्त्रीमा उम्मेदवारी दिन लागेका हुन्। 

आगामी ९–१३ मंसिरमा कांग्रेसको १४औँ महाधिवेशन हुने कार्यतालिका छ। -न्युज कारखाना