नेतृत्व गद्दार हुँदा जनयुद्धले धक्का खायो : बैद्य

काठमाडौं– नेकपा क्रान्तिकारी माओवादीका अध्यक्ष मोहन बैद्यले मूल नेतृत्व गद्दार भएपछि जनयुद्धले गम्भीर धक्का खाएको टिप्पणी गरेका छन्।

उनले नेतृत्व गद्दारी भएका कारण जनयुद्ध र क्रान्तिले धक्का खाएको बताए।

नेपाली जनवादी क्रान्तिले धक्का खाए पनि क्रान्ति प्रक्रिया नसकिएको उनको दाबी छ।

‘माओवादी आन्दोलनभित्रै मूल नेतृत्वमा पैदा भएको नवसंशोधनवादी विचलन र गद्दारीका कारण जनयुद्ध र क्रान्ति प्रक्रियाले गम्भीर धक्का खान पुगेको छ’, २५ औं जनयुद्ध दिवसमा बैद्यले जारी गरेको विज्ञप्तिमा भनिएको छ, ‘दस वर्षको महान् जनयुद्ध, झापा विद्रोह र विभिन्न जनआन्दोलनमा जनताले बगाएको रगतको आहालमा टेकेर सरकारमा पुगेका नेताहरुले आज घरेलु प्रतिक्रियावादी सत्ताको नेतृत्व गर्दै साम्राज्यवाद र विस्तारवादको दलाली गरिरहेका छन् ।’

नेकपा अध्यक्ष पुष्पकमल दाहाललाई बैद्यले लाखौंको बलिदानी गराएर आफूले भने आत्मसमर्पण गरेको आरोप लगाएका छन्।