कुवेतमा विस्फोटसँगै पहिरो जाँदा चार नेपालीको मृत्यु, ६ जना बेपत्ता

काठमाडौं- कुवेतको एक खानीमा बम पड्काएर ढुंगा फुटाउने क्रममा पहिरो खस्दा चार नेपालीको मृत्यु भएको छ ।

कुवेतस्थित अलमुतलायामा रहेको ढुंगा/बालुवा खानीमा काम गरिरहेको बेला ढुंगा फुटाउन विस्फोट गराइएको थियो । विस्फोटपछि ढुंगाको ठूलो थुप्रोले उनीहरुलाई पुरेको अरब टाइम्सले जनाएको छ।

मृत्यु हुनेमा चार नेपाली रहेको भनिएपनि अझै धेरै संख्यामा हुनसक्ने आशंका गरिएको छ । पहिरोमा पुरिएकामध्ये सात जनालाई बाहिर निकालिएको छ ।

जसमध्ये चार नेपालीको मृत्यु भएको छ भने अन्य तीन जना गम्भीर घाइते भएका छन् । घाइतेको स्थानीय जहान अस्पतालमा उपचार भइरहेको छ।

पहिरोमा १३ नेपाली र एक भारतीय नागरिक परेको आशंका गरिएको थियो । उनीहरु ढुंगा र बालुवाको थुप्रोमा पुरिएको अरब टाइम्सले जनाएको छ।

उद्धारकर्र्ताहरुले बेपत्ताहरुको खोजी जारी राखेको बताएका छन् । घटनामा परी ज्यान गुमाउने तथा घाइते हुनेहरुको परिचय भने खुलेको छैन ।